NAVI MUMBAI | पनवेल–कर्जत रेल्वे मार्ग अंतिम टप्प्यात; खासदार श्रीरंग आप्पा बारणे यांनी केली पाहणी
मावळ मतदारसंघाचे खासदार श्रीरंग आप्पा बारणे यांनी पनवेल–कर्जत रेल्वे मार्गाच्या कामाची प्रत्यक्ष पाहणी केली. या वेळी रेल्वे अधिकाऱ्यांकडून प्रकल्पाच्या प्रगतीची माहिती घेण्यात आली. सध्या हा महत्त्वाकांक्षी रेल्वे प्रकल्प अंतिम टप्प्यात असून पुढील तीन ते चार महिन्यांत काम पूर्ण होण्याची शक्यता व्यक्त करण्यात आली आहे.
पनवेल ते कर्जत दरम्यान उभारण्यात येणारा हा रेल्वे मार्ग मुंबई महानगर क्षेत्रातील वाहतूक व्यवस्थेसाठी अत्यंत महत्त्वाचा मानला जात आहे. या मार्गामुळे पनवेल, कर्जत तसेच परिसरातील नागरिकांना जलद, सुरक्षित आणि सुलभ प्रवासाची सुविधा उपलब्ध होणार आहे. तसेच उपनगरी रेल्वे सेवेला मोठी चालना मिळणार असल्याचे सांगण्यात आले.
पाहणीदरम्यान खासदार बारणे यांनी कामाचा वेग कायम ठेवून दर्जेदार पद्धतीने प्रकल्प पूर्ण करण्याच्या सूचना संबंधित अधिकाऱ्यांना दिल्या. प्रवाशांसाठी आधुनिक सुविधा, सुरक्षितता आणि वेळेची बचत यावर विशेष भर देण्यात येत असल्याचे त्यांनी नमूद केले.
हा रेल्वे मार्ग सुरू झाल्यानंतर पनवेल–कर्जत दरम्यानचा प्रवास अधिक सोयीस्कर होणार असून स्थानिक नागरिक, नोकरदार वर्ग आणि विद्यार्थ्यांना मोठा दिलासा मिळणार आहे.
